Հրաչյա Ռոստոմյանն ու Դելփյան խաղերի միջազգային կոմիտեի տնօրենը քննարկել են համաշխարհային խաղերը Հայաստանում անցկացնելու հնարավորությունը


12-10-2017 17:22:36

ՀՀ սպորտի և երիտասարդության հարցերի նախարար Հրաչյա Ռոստոմյանն այսօր ընդունել է Դելփյան խաղերի միջազգային կոմիտեի տնօրեն Վլադիմիր Պոնյավինին, տեղեկացնում են նախարարության լրատվական ծառայությունից:

Կողմերը քննարկել են Հայաստանի Հանրապետությունում ազգային դելփյան խաղերի և առաջին անգամ նախատեսվող համաշխարհային դելփյան խաղերի անցկացման հնարավորությունը:

«Կարևորում եմ ազգային դելփյան խաղերը, քանի որ դրանց մասնակցում է երկրի շնորհաշատ երիտասարդությունը: Սա ևս մի հնարավորություն է մշակույթի և սպորտի ոլորտներում նրանց հմտությունները բացահայտելու համար», - ասել է նախարարը:

Նրա խոսքով՝ մենք ունենք դելփյան խաղերի անցկացման փորձ, քանի որ դելփյան խաղերը 2010 թվականին անցկացվել են Հայաստանում:

«Կարծում եմ՝ համաշխարհային խաղերը, լինելով առավել մեծամասշտաբ, նպաստելու են ողջ աշխարհում մեր երկրի ճանաչելիության բարձրացմանը», - ասել է Հ. Ռոստոմյանը և ավելացրել, որ դելփյան առաջին համաշխարհային խաղերը Հայաստանում անցկացնելու հնարավորությունը կքննարկվի Դելփյան խաղերի միջազգային կոմիտեից ծրագրերը, տեխնիկական և կազմակերպչական հարցերը ներկայացվելուց հետո:

Նշենք, որ Դելփյան խաղերն ամենամյա են և ունեն մշակույթի ու սպորտի ոլորտներն ընդգրկող 42 անվանակարգեր:


843





Գլխավոր լուրեր